ერთეულების ჯოხებით გაყოფა

ამ აქტივობაში მასწავლებელი ერთეულების ჯოხებს გარკვეულ მნიშვნელობებს მიანიჭებს და მათი საშუალებით სხვადასხვა პრობლემას წამოაყენებს, მოსწავლეებმა კი დამოუკიდებლად უნდა ამოხსნან ეს პრობლემები და ჩაიწერონ ამოხსნები. მიეცი მოსწავლეებს იმდენი დრო რამდენიც დასჭირდებათ, თავიდან 1 და 2 წუთი, შემდეგ კი, როცა გართულდება – მეტი.

პრობლემა 1. თუ წითელი ერთეულების ჯოხი უდრის 10-ს, რას უდრის დანარჩენი ჯოხები?

შენიშვნა: შენ შეგიძლია წარმოადგინო პრობლემები თითქმის უსიტყვოდ, უბრალოდ დაფაზე აჩვენე შესაბამისი ჯოხი და მიაწერე ღირებულება.

თუ მოსწავლეებს აქამდე არ უმუშავიათ მსგავს პრობლემებზე, შეგიძლია რამდენიმე მაგალითი მათთან ერთად ამოხსნა. მაგალითად, იისფერი ჯოხი უდრის 2 წითელ ჯოხს, ანუ 2 ცალ ათს. რაც ნიშნავს, რომ იისფერი ჯოხი არის 20. შესაბამისად მუქი მწვანე იქნება 30. ვინაიდან ღია მწვანე არის მუქი მწვანის ნახევარი, ის უნდა იყოს 15 და ასე შემდეგ. მოსწავლეებმა წესით მალე უნდა აუღონ ალღო.

როდესაც მოსწავლეები იპოვიან ყველა ჯოხის მნიშვნელობას, სთხოვე მათ დაამტკიცონ, საიდან იციან, რომ მაგალითად ლურჯი ჯოხი არის 45. ამის დამტკიცების ბევრი გზა არსებობს იმის გამოყენებით, თუ რა იცი სხვა ჯოხებზე. მაგალითად, ლურჯი ჯოხი არის 4 წითელი (ანუ 4 ცალი ათი), პლუს 1 ცალი თეთრი (1 ცალი ხუთი), ანუ 45. ასევე, ის უდრის ყვითელს დამატებული იისფერი, ანუ 25 + 20 = 45. ასევე, ის მხოლოდ ერთი თეთრით ნაკლებია ვიდრე სტაფილოსფერი, ანუ 50 – 5 = 45. და ასე შემდეგ.

პრობლემა 2. თუ იისფერი უდრის 32-ს, რას უდრის დანარჩენი ჯოხები?

ამ შემთხვევაში, ყველა ჯოხი იქნება 8-ს ჯერადი.

როდესაც მოსწავლეები აჩვენებენ საკუთარ ამოხსნის გზებს, შეგიძლია ბევრი პრობლემა ერთდროულად მისცე.

პრობლემა 3. თუ მუქი მწვანე უდრის 48-ს, რას უდრის დანარჩენი ჯოხები?

პრობლემა 4. თუ ყავისფერი უდრის 72-ს, რას უდრის დანარჩენი ჯოხები?

პრობლემა 5. თუ შავი უდრის 56-ს, რას უდრის დანარჩენი ჯოხები?

პრობლემა 6. თუ სტაფილოსფერს+ყვითელი უდრის 60-ს, რას უდრის დანარჩენი ჯოხები?

თუ დაგჭირდება მეტი პრობლემა, მოაფიქრებინე მოსწავლეებს.