საკითხები: გამრავლება; მრავალსაფეხურიანი ამოცანები
მასალები: პატერნის ბლოკები; ფურცელი და ფანქარი
თუ იცი რას უდრის ერთი ბლოკი, შეგიძლია გამოთვალო რას უდრის დანარჩენები?
რატომ არის კარგი აქტივობა
აქტივობა ეხება იმ ძირითად იდეებს, როგორიცაა ერთეულის შეცვლა და გამრავლება, რისი დახმარებითაც მოსწავლეები ემზადებიან გაყოფისა და წილადების შესასწავლად. აქტივობა ძალიან ხელშესახები და მოქნილია.
დაწყება
ამ აქტივობის იდეა იგივეა, რაც პატერნის ბლოკებით გამრავლება 1-ის, თუმცა ამოცანები უფრო გართულებულია და მეტ საფეხურს მოიცავს. გაითვალისწინე, რომ რომბები და სტაფილოსფერი კვადრატები ამ გაკვეთილში არ გამოიყენება.
შეადგინე პატერნის ბლოკების 3 ჯგუფი:
ერთი – 5 ექვსკუთხედით
მეორე – 11 ტრაპეციით,
მესამე – 4 ექვსკუთხედით, 3 ლურჯი რომბით და 2 სამკუთხედით.
დაიწყე მარტივი შეკითხვით: თუ სამკუთხედი უდრის 1-ს, რას უდრის მთელი გუნდი?
მოსწავლეებს შეუძლიათ შეკითხვას უპასუხონ დამოუკიდებლად, ან წყვილებში.
სთხოვე, ამოხსნა დაწერონ ფურცლებზე და მოკლედ განიხილეთ, თუ როგორ მიიღეს, ან მიიღებდნენ პასუხს.
ამის შემდეგ, დაუსვი მათთვის შესაბამისი სირთულის შეკითხვები:
რას უდრის ერთი ჯგუფი, თუ:
- რომბი უდრის 4-ს?
- ტრაპეცია უდრის 9-ს?
- სამკუთხედი უდრის 5-ს?
- ექვსკუთხედი უდრის 12-ს?
- სამკუთხედი უდრის 7-ს?
- რომბი უდრის 8-ს?
შეჯამება
შეარჩიე მოსწავლეების მიერ ამოხსნილი (ან ნაცადი) ყველაზე რთული პრობლემა და განიხილე მისი ამოხსნის სხვადასხვა გზები. მაგალითად, თუ ტრაპეცია უდრის 9-ს და გინდა გაიგო რას უდრის 5 ექვსკუთხედი, შენ შეგიძლია:
- წარმოიდგინო 5 ექვსკუთხედი, როგორც 10 ტრაპეცია და დათვალო -> 10 x 9 = 90
- თქვა, რომ თითოეული ექვსკუთხედი უდრის 2 ტრაპეციას, ანუ თითოეული ექვსკუთხედი უდრის 2 x 9 = 18. ეს ნიშნავს, რომ 5 ექვსკუთხედი = 5 x 18 = (5 x 10) + (5 x 8) = 50 + 40 = 90
- იფიქრო, რომ რადგან ტრაპეცია უდრის 9-ს, სამკუთხედები უნდა უდრიდეს 3-ს. შემდეგ წარმოიდგინო თითოეული ექვსკუთხედი, როგორც 6 სამკუთხედი. ეს ნიშავს, რომ თუ გვაქვს 30 სამკუთხედი, საიდანაც თითოეული უდრის 3-ს, სულ გვაქვს 30 x 3 = 90
რჩევები
- სირთულის დასარეგულირებლად, შეგიძლია ცვალო ფიგურების ჯგუფები – გაზარდო, დააპატარავო, ან აურიო სხვადახვა ფიგურა.
- არ ეცადო, რომ ყველა მოსწავლე ერთობლივად ერთსა და იმავე პრობლემაზე ამუშაო. პირიქით, მიეცი მათ საშუალება ამოხსნან მათთვის შესაბამისი სირთულის ამოცანები. უბრალოდ დარწმუნდი, რომ პრობლემა, რომელსაც ბოლოს განიხილავ, ყველას ექნება შესრულებული (ან ნაცადი მაინც).
- წაახალისე მოსწავლეები, რომ ჩაინიშნონ მათი გამოთვლები მათემატიკური გამოსახულებებით, ან მარტივი ჩანახატებით.
- თუ ზოგიერთი მოსწავლე მზად იქნება, უთხარი, რომ ექვსკუთხედი უდრის 3-ს, ან ტრაპეცია უდრის 1-ს, იმისათვის, რომ პასუხად მიიღონ წილადები.
- იმ მოსწავლეებისთვის, რომლებსაც შედარებით გაუჭირდებათ, კარგი მინიშნება იქნება, რომ ივარჯიშონ ცალკეულ ბლოკებზე (სამკუთხედი, რომბი, ტრაპეცია, ექვსკუთხედი), სანამ უფრო დიდ ფიგურებზე გადახვალთ.